Форуми во заедницата

  Програмата “Форуми во заедницата“ продолжува да се реализира во општина Долнени, со втората сесија што се одржа на 21 јануари, во просториите на ресторанот „М„ во село Лажани, а во присуство на 43 граѓани.

  Присутните, во рамки на осумте “работни маси“, преку дискусии дефинираа и групираа неколку проблеми според кои се формираа поттеми за утврдената тема од првата форумска сесија, “Заштита на животната средина“.
“Добро е што овде одлучуваат граѓаните“, изјави еден од присутните на Форумот Рамадан Реџепоски, од село Дебреште.
   Проблемите на кои жителите им дадоа приоритет се групираа во четири групи: непостоење на канализации, недоволно третирање на отпад-појава на диви депонии, недостаток на здрава вода за пиење и недоволно зелени површини.
   Согласно овие проблеми, присутните граѓани формираа работни групи кои за овие групи на проблеми ќе направат истражување на терен за да утврдат каква е моменталната состојба во општината.
   Според градоначалникот на Долнени Изудин Каришиќ, пак, треба да се зголеми учеството на форумските сесии и повика на помасовно учество.
   Буџетот за програмата “Форуми во заедницата“ во општина Долнени изнесува шест милиони денари, од кои 1,5 милиони денари се учество на општината, а 4,5 милиони денари се донација на Швајцарската агенција за развој и соработка (SDC).
   Програмата, во оваа фаза, се спроведува во уште седум општини – Берово, Битола, Свети Николе, Ново Село, Ресен, Долнени, Сарај и Кочани.
   Спроведувач на Програмата во оваа општина е Здружението за одржлив развој и соработка “Алка“.