Форуми во заедницата

Околу 66 жители присуствуваа на петтата форумска сесија што на 29 април се одржа во основното училиште Дедо Иљо Малешевски, во општина Берово.

Присутните на сесијата, што се одржува во рамки на програмата “Форуми во заедницата“, со голем ентузијазам и посветеност презентираа осум предлог проекти, врз основа на проблемите што во претходните сесии ги детектираа како приоритетни во својата општина. Тоа се Чиста околина, Европски карневал, Изградба на тротоари и атмосферска канализација, Кафе на плоштад, Чиста вода - здрав живот, Шеталиште и рекреација за сите, Култура и традиција и Спорт за сите.
  Предлог-проектите произлезени од Форумот беа разработувани на работните групи што се одржуваат меѓу форумските сесии, а сите беа поддржани од присутните граѓани како основани и издржливост.
  Жителите дадоа “зелено светло“ за понатамошна реализација на проектите, а Форумот соодветствуваше на идеалната структура за работа од аспект на полова, етничка и возрасна структура, што придонесе за успешна дебата.
  На сесијата беше присутен и градоначалникот Драги Наџиски кој им посака успешна работа на граѓаните и ги поздрави нивните амбиции. Тој, воодушевен од начинот на работа и организираноста, изјави дека ќе даде целосна поддршка за понатамошна соработка.
  Вкупниот буџет на програмата “Форуми во заедницата“ во општина Берово е осум милиони денари, од кои два милиони ги обезбедува општината, а шест милиони се донација на Швајцарската агенција за развој и соработка (SDC).