Форуми во заедницата

 Работните групи изведоа четири презентации при што со слики, слајдови и описи на проблемите беа анализирани приоритетните прашања во рамки на четирите групите-проблеми дефинирани на вториот Форум.
 Презентациите се однесуваа на “Несоодветно собирање на отпадот, диви депонии и ниска еколошка свест“, „Водоснабдување и одвод на отпадни води“, „Урбана инфраструктура“ и „Изградба и реконструкција на патната инфраструктура“.
 Првата група истакна дека на туристичко место како Крушево не му доликува да има дива депонија која е видлива од сите страни и го нарушува угледот на градот. Немањето ниту едно возило за собирање и транспорт на сметот е исто така голем проблем.
 Претставник на втората група говореше за проблемот со достапност на водата во Крушево кој е многу сериозен и покрај тоа што Крушево и неговата околина имаат голем воден потенцијал.
 Третата група ги анализираше проблемите од урбаната инфраструктура кои беа посочени од граѓаните, а пред се пазарот и плоштад со паркинг.
 Претставник на четвртата група посочи повеќе улици во градот кои се најкритични и чија реконструкција е приоритетна, како што се “Таќа Бербер“, “Мише Ефтим“, “Ќиро Фетак“, “Илинденска“. Нерешениот проблем со улиците во градот остава грда слика не само за жителите туку и туристите кои доаѓаат во Крушево, беше посочено на презентацијата.
 Сесијата посочи вкупно пет предлог-решенија согласно коишто се формираа работни групи што ќе ги изработуваат предлог-концептите.
Утврдените предлог-решенија се Третман на отпадот во општина Крушево, Решавање на проблемот со полските патишта во с. Бучин,  Реконструкција на улиците „Таќи Берберот“, „Мише Ефтим“ и „Ќиро Фетак“, Асфалтирање на улицата „Ќиро Фетак“ во Крушево и Изградба на градски пазар во Крушево.
 Вкупниот буџет на Програмата за општина Крушево изнесува четири милиони денари, од кои еден милион денари се учество на општината, а три милиони денари донација на Швајцарската агенција за развој и соработка (SDC).