Форуми во заедницата

Крушевчани го избраа проектот за Градскиот пазар

1.04.2010.

“Покривање и уредување на градскиот пазар во Крушево“ е проектот што го избраа жителите на Крушево како приоритетен во решавањето на проблемите од нивниот секојдневен живот.   Околу 50 жители на општината присуствуваа на седмата форумска сесија што се одржа на 24 март во Пензионерскиот дом во Крушево, каде присутните гласаа за еден од петте проекти кои во изминатите месеци ги изработуваа работните групи.     “Граѓаните, преку Форумите, учествуваа во развојот на градот, во детектирање на проблемите во општината“, изјави градоначалникот на Крушево Василчо Дамчевски, додавајќи дека крајната цел е избор на проекти што се приоритетни за граѓаните.     Проектот за Градскиот пазар е со вкупен буџет од 14 милиони денари, од кои 10 милиони денари треба да ги обезбеди македонската Влада, а остатокот од четири милиони денари се од проектниот фонд на Програмата.     Изведувањето на проектот треба да се одвива во неколку фази, меѓу кои и изградба, а оваа фаза предвидува ставање покрив и внатрешно уредување на пазарот. Останатите средства од Фондот се предвидени за набавка на контејнери, во рамки на второрангираниот проект.     “Верувам дека сите проекти се значајни за жителите, но сепак, средствата се ограничени“, изјави раководителот на Програмата Сунчица Костовска-Петровска, од организацијата што ја спроведува Програмата во Крушево – ФИООМ.     Таа додаде дека ова е прва можност за граѓаните да решат каде ќе ги доделат средствата, со можност да донесат одлука со резултати.     Покривањето и уредување на Градскиот пазар предвидува обложување на под, пристап до објектот, внатрешен олук и поставување на тезги на пазарот во Крушево. Со пазарот ќе стопанисува ЈП “Комуна“, а времетрањето на изработката е шест месеци.     Сесијата презентираше и осум препораки на граѓаните до општината кои се однесуваат на приоритетни прашања за подобрување на нивното секојдневие.     Програмата во општина Крушево започна да се реализира во октомври, минатата година, со вкупен буџет од четири милиони денари, од кои еден милион е учество на општината и три милиони денари донација на Швајцарската агенција за развој и соработка (SDC).

 

< Претходно		Следно >